Dr Eldenger Maibaum
Was goht do eigendlich vor sich, wenn Kerle alloi en dr Wald ganget on en Maibaum schlaget? Om do a bißle Licht en dr dongle Wald zom brenga, hann i des Johr Meisle schbiela dirfa. Irgendwie war’s scho a komisch’s Gfühl, als oinzige Frau mit so viele Kerle en dr Wald zom Fahra. Als dann dr Alex em Audo zu mir gsagt hot, daß mer mir vielleicht d’Auga vrbenda sott, isch mer’s gschwend a bißle mulmig gworda. „I vrzehl gwieß nix, wo mir genau nogfahra senn“, hann i brav on ardig vrschbrocha. Em Wald hann i dann au no a grün’s Filzhiadle mit ra Feder uffgsetzt kriagt. „Was hot au dees jetzt zu bedeuda“, hann i dr Alex vorsichdig gfrogt. „Dees kriagt emmer der uff, der s’erschde Mol mit em Wald isch“, hot er erglärt, aber dui Gschicht isch mir glei a bißle suschbekt vorkomma. Irgendwie hann i’s Gfühl ghet, daß i mi grad komblett zom Affa mach, aber dees war mir en dem Moment völlig wurschd. I benn mer vorkomma, wia a Prinzessin em Wald. Voller Schdolz benn i mit onsre jonge Kerle en dr Wald neigschdapft, bis zu denne zwoi Birka, die se ausgsuacht henn. „Die hot zwar dr dennere Schdamm, aber die ander isch fai scheener.“ „Die hot aber weider oba en leichda Knigg, aber des isch net so schlemm, dia nemmer mer jetzt“. Dr Lorenz, hot net lang gfaggelt, sei Keddasäg gschnabbt on ratz fatz dr Baum omgsägt. Punkt vierdel nach drei war’s dann soweit: Onser Maibaum war gfällt! So, on jetzt waret onsre Eldenger Kerle an dr Reihe. Die henn gschwend dr Baum uff ihre Schuldra gnomma on aus em Wald nausdraga. Des Ganze hot ausgsäh, wia bei de 7 Schwoba, bloß, daß die echt eipagga kennat, wenn mer onsre 11 schdarge Eldenger so oguggt. Selbschd i war fix on ferdig, bloß alloi vom Zuagugga. Aber dees war jo no net älles: Dr Baum sott jo au no uff dr Henger nuff. Daß dees genauso guad klabbt, hot’s für jeden gschwend a Fläschle Eldenger Zauberbräu gäbba. Frisch gschdärgt henn se zsamma den schwera Baum nuffghievt on feschdzurrt. Dann isch’s erschmol zrigg nach Eldenga ganga. Schbäder, uff em Kirchblatz, henn dann onsre Kerle nomol richdig schaffa missa. Dr Alex hot sogar en exdra Schuahleffel für dr Maibaum konschdruiert, des dr Schdamm besser en dr Boda neirutscht. Isch dees net klasse? S’Ergebnis hot sich echt säha lassa kenna: En brächdiger Eldenger Maibaum! On dromrom a richdigs schees Feschdle, sogar ohne Räga, was will mer meh.
En riesa Dank an onsre schdarge Kerle vom Eldenger Kirbeverei on an älle, die so a tolls Feschd überhaubt meglich machet!